Changing The World Is Not Just A Dream

Posts tagged ‘مواطنة’

يوميات طالب جامعي! -1

يما يلي سترون بعض المشاهدات اليومية في جامعتي الجامعة الهاشمية, قد أكون قاسياً بعض الشيء, لكن هذا ما هو إلا فيض من غيض:

المواطنة الصالحة انك تكتب على حيط الجامعة المدهون امبارح “الله الوطن الملك” للتعبير عن انتماءك منقطع النظير
المواطنه الصالحة انك تقلب الباص محششة وتنفخ بوجوه الناس وانت عارف انو القانون بمنعك ومش سائل
المواطنة الصالحة انك تخرب اجهزة مختبر الحاسوب ومرافق الجامعة الأخرى عشان شلتك ينبسطو ويضحكوا
المواطنة الصالحة انك تلعب كرة بقزازة المي الفاضية بنص الجامعة وقالبلي اياها دوري المناصير
المواطنة الصالحة انك تهوي لصاحبك عشان شب اتطلع في خلقتو وبعدين تقلبلي الجامعة ميدان حرب
“المواطنة الصالحة انك تستغل جهل بعض الطلاب عشان مصالحك الخاصة عملاً بمبدأ “الغاية تبرر الرذيلة
المواطنة الصالحة انك تضيع تعب ابوك وما تحضر محاضرات, وعاملي دونجوان وبتلف ورا بنات العالم
المواطنة الصالحة انك تطلع تحجز نص الباص وتترك البنات واقفين عشان تقعد الشلة كلها حواليك, حرام تزهق بالطريق بعدين
المواطنة الصالحة انك تكون مستعد تسحق اي حدا بخالفك برأيك كأنك انت مركز الأرض وكل كلامك صح وما بحتمل النقاش
المواطنة الصالحة انك تقعدلي عالباب تعلق عالرايح والجاي وما في لا شب ولا بنت بسلموا من لسانك
المواطنة الصالحة انك تقعد تصيح وتضحك وفي محاضرة جنبك وحضرتك مش سائل بالبشر اللي جوا
المواطنة الصالحة انك تترك حنفية المي مفتوحة بالجامعة بعد ما تستعملها لأننا بلد غني بالمصادر المائية
المواطنة الصالحة انك تشتغل فتان وتنقل حي بين العالم وتبهر من عندك عشان تعمل مشاكل
المواطنة الصالحة انك تحكي مع “فلان” عشان يتوسطلك عند الدكتور يحطلك علامة منيحة بمادة ما بتنجح فيها حتى
المواطنة الصالحة انك تترك زبالتك محل ما كنت قاعد وكأنو في خدم وحشم بلموا وراك
المواطنة الصالحة انك ما تكون عارف ليش جاي عالجامعة اصلاً, وقاعد ومشغل الموبايل الصيني ابو 6 سماعات عالعالي
المواطنة الصالحة انك تتخوت عالناس اللي لسا مصرة تتعلم وتحبط فيهم عشانك مش عارف شو الهدف من وجودك, هدول مستقبل البلد
المواطنة الصالحة انك فاتحلي مكتبة الجامعة ديوانية او انك جاي تحب بالمكتبة وناسي قيمة الكتب واللي ألفوها اللي حواليك
المواطنة الصالحة انك تسب وتكفر بنص الجامعة بدون ادنى احترام للناس ولقدسية المكان اللي انتا مش عارف قيمتو
المواطنة الصالحة انك تقعد تطلق احكام على الناس ومفكر حالك خليفة الله بالأرض وبدك كل العالم يمشو على هواك
المواطنة الصالحة انك تعملي حالك افلاطون ونازل تنظر عالناس وتحاضر فيهم وانت اسوأ من كل اللي بتنتقدو

عجبا,ً طلعت مواطن جاحد وسيء!